Please Enter Bible Reference like John 3:16, Gen 1:1-5, etc
numbers - 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36
Bible Versions
यहोवा मूसा स कहेस,
“इ बातन इस्राएल क मनइयन स कहा: कउनो मनसेधू या मेहरारु कछू निस्चित समइ बरे आपन आप क परमेस्सर क अपर्ण कइ क कसम खाइ सकत ह। उ मनई नाज़ीरी कहा जाई।
उ टेम मँ मनई क कउनो दाखरस या कउनो जियादा नसीली चीज नाहीं पिअइ चाही। मनई क सिरका जउन दाखरस स बना होइ या कउनो जियादा नसीला पिअनी नाहीं पिअइ चाही। उ मनई क अंगूरे क रस नाहीं पिअइ चाही अउर न ही अंगूर या किसमिस खाइ चाही।
उ पवित्रीकरण क काल मँ उ मनई क अंगूर स बना कउनो चीज नाहीं खाइ चाही। उ मनई क अंगूरे क बिया या बोबला भी नाहीं खाइ चाही।
“पवित्रीकरण क काल मँ उ मनई क आपन बार नाहीं काटइ चाही। उ मनइ क उ टेमॅ तलक सुद्ध रहइ चाही जब तलक पवित्रीकरण क काल खतम न होइ। ओका आपन बार क लम्बा होइ देइ चाही। उ मनई क बार परमेस्सर क दीन्ह गवा पवित्रीकरण क बचन क एक खास हींसा अहइ। उ ओन बारन क परमेस्सर क भेंट क रूप मँ देई। एह बरे उ मनई आपन बारन क तब तलक लम्बा होइ देइ जब तलक अलग होइ क टेमॅ खतम होई।
“इ पवित्रीकरण क काल मँ इ कउनो नाज़ीर क कउनो ल्हासे क लगे नाहीं जाइ चाही। काहेकि उ मनई आपन क पूरी तरह स यहोवा क अपिर्त कइ दिहे अहइ।
जदि ओकर आपन बाप, आपन महतारी, आपन भाई या आपन बहिन भी मरि जाइँ तउ भी ओका ओनका छुवइ न चाही। इ ओका अपवित्तर करी। ओका इ देखावइ चाही कि ओका अलग कीन्ह ग अहइ अउर आपन क पूरी तरह परमेस्सर क अपिर्त कइ चुका अहइ।
जउन पूरा टेमॅ मँ उ अलग कीन्ह गवा उ पूरी तरह आपने यहोवा क अपिर्त किहे रहा अहइ।
“इ होइ सकत ह कि नाज़ीर कउनो दूसर मनई क संग होइ अउ दूसर मनई एकाएक मरि जाइ। जदि नाज़ीरी मरे भए मनई क छुई तउ उ अपवित्तर होइ जाइ। जदि अइसा होत ह तउ नाज़ीरी क मूँड़ स बार कटवावइ चाही। इ सबइ बार ओकरे खास दीन्ह गए बचन क हींसा रहेन। ओका आपन बारन क सतऍ दिन काटइ चाही काहे की उ दिन उ पवित्तर कीन्ह जात ह।
तब अठवें दिन ओका दुइ फाखता या कबूतरी क दुइ बच्चा याजक क लगे लइ आवइ चाही। ओका याजक बरे ओनका मिलापवाला तम्बू क दुआरे देइ चाही।
तब याजक एक क कबूतरी पापबलि क रूप मँ भेंट करी। उ दूसरे कबूतरी क होमबलि क रूप मँ भेंट करी। अउर याजक उ मनई क ओकरे पाप बरे प्रायस्चित करब्या। (उ पाप किहेस काहे की उ ल्हास क लगे रहा।) उ समइ उ मनई फुन बचन देइ कि मूँड़े क बारन क यहोवा बरे भेंट करी।
ऍकर इ अरथ भवा कि उ मनई क फुन पवित्रीकरण क काल मँ दूसर समइ बरे आपन आप क यहोवा क अपिर्त कइ देइ चाही। उ मनई क एक बरिस क नर मेमना लावइ चाही। उ ऍका दोखबलि क रूप मँ देइ। ओकरे पवित्रीकरण क सब दिन बिसराइ दीन्ह जात अहइँ। उ मनई क नवा अलग होइके टेमॅ सुरु करइ क होइ। इ जरुर कीन्ह जाइ काहे की उ पवित्रीकरण पहिले काल मँ एक ल्हास क छुए रहा।
“जब मनई क अलग होइ क टेमॅ पूरा होइ जाइ तउ ओका इ जरुर करइ चाही। ओका मिलापवाला तम्बू क दुआर प जाइ चाही।
हुवाँ उ आपन भेंट यहोवा क देइ। ओकर भेंट होइ चाही:होमबलि बरे बिन दोखे क एक बरिस क नर मेमना पापबलि क भेंट खातिर बिन दोखे क एक बरिस क मादा मेमना। मेलबलि बरे बिन दोखे क एक नर भेड़ा।
बे खमीरे क बनी भइ रोटिन-नीक आटा मँ साना भवा तेले स बना केक-ऍनके ऊपर लावइ चाही। अउर दूसर अन्नबलि अउ पयेबलि जउन इ भेंटन क एक हींसा अहइ।
“तब याजक इ चीजन क यहोवा क देइ। याजक पापबलि अउ होमबलि चढ़ाई।
याजक बे खमीरे क रोटी क टोकरी यहोवा क देइ। तब उ यहोवा क मेलबलि क रूप मँ भेड़ा क मारी। उ यहोवा क अन्नबलि अउ पयेबलि क संग ऍका देइ।
“नाज़ीर क मिलापवाला तम्बू क दुआर प जाइ चाही। हुवाँ ओका आपन बार कटवावइ चाही जेका उ यहोवा बरे बढ़ाए रहा। ओन बारन क मेलबलि क नीचे आगी क ऊपर रखई चाही।
“जब नाज़ीर आपन बारन क काटि चुकी तउ याजक ओका भेड़ा क एक ठु उसना भवा काँध अउ टोकरी स एक ठु बड़वार अउ एक ठु नान्ह क केक देइ। इ दुइनउँ केक बे खमीरे क बना होइहीं।
तब याजक इ चीजन क यहोवा क अगवा हलाई। इ एक ठु उत्तोलनबलि अहइ। इ चीजन पवित्तर अहइँ अउ याजक क अहइँ। भेड़ा क छाती अउ जाँघ भी यहोवा क समन्वा हलावा जइहीं। इ चीजन भी याजक क बाटिन। ऍकरे पाछे नाज़ीरी दाखरस पी सकत ह।
“जदि कउनो मनई नाज़ीर होइ चाहत ह तउ ओका यहोवा क इ सबहिं भेंट देइ चाही। इ नेमॅ ओन मनइयन बरे अहइँ जउन नाज़ीर होइ क बचन लेत हीं। जदि कउनो मनई जियादा देइ क बचन देत ह तउ ओका आपन बचन क निभावइ बरे नाज़ीर क नेमॅ क मुताबिक करइ चाही।”
यहोवा मूसा स कहेस,
“हारून अउ ओकरे पूतन स कहा। इस्राएल क लोगन क आसीर्बाद देइ क तरीका इहइ अहइ, ओनसे कहा:
यहोवा तोहका आसीस देइ अउ तोहार रच्छा करइँ।
यहोवा क कृपा-दृस्टि तोहे प उजागर होइ। उ तोहसे पिरेम करइ।
यहोवा क दृस्टि तोह प होइ। उ तोह पइ दाया करी उ तोहका सान्ति क साथ आसीर्बाद देइ।”
तब यहोवा कहेस, “इ तरह हारून अउ ओकर पूत इस्राएल क मनइयन क समन्वा मोर नाउँ लेइहीं अउ मइँ ओनका आसीर्बाद देब।”