Please Enter Bible Reference like John 3:16, Gen 1:1-5, etc
Bible Versions
सागर क रेगिस्तान क बारे मँ दुःखद सँदेसा:रेगिस्ताने स कछू आवइवाला अहइ। इ नेगव स आवत हवा जइसा आवति बाटइ। इ कउनो खउफनाक देस स आवति अहइ।
मइँ कछू लखेउँ ह जउन बहोत ही भयानक अहइ अउर घटइ ही वाला अहइ। मोका गद्दार तोहका धोखा देत भए देखॉत हीं। मइँ लोगन क तोहार पचन्क धन छोरत भए लखत हउँ। एलाम, तू जा अउर जुद्ध करा! मादै, तू आपन फउजन लइके नगर क घेरि ल्या अउर ओका हरावा। मइँ उ बुराई क अन्त करब जउन उ नगर मँ बाटइ।
मइँ इ सबइ भयानक बातन लखेउँ अउर अब मइँ बहोत डेराइ गएउँ ह। डर क मारे पेट मँ दर्द होत अहइ। इ दर्द जच्चा क पीरा जइसा अहइ। जउन बातन मइँ सुनत हउँ, उ सबइ मोका बहोत डेरावत अहइ। जउन बातन मइँ लखत हउँ, ओनके कारण मइँ डर क मारे कँापइ लागत हउँ।
मइँ चिन्तित हउँ अउर भय स थर-थर काँपत हउँ। मोर सुहावनी साँझ डर क रात बन गई ह।
लोगन सोचत हीं, सब कछू ठीक अहइ। लोग कहत हीं, “चौकी तइयार करा अउर ओह पइ आसन बिछावा, खा, पिआ।” किन्तु मोर कहब अहइ, “मुखिया लोगो! खड़ा ह्वा अउर जुद्ध क तइयारी करा।” उहइ समय फउजी कहत अहइँ, “पहरूअन क तैनात करा। अधिकारी लोगो, खड़ा होइ जा अउर आपन ढालन क झलकावा!”
मोर सुआमी मोका इ सबइ बातन ह, “जा अउर नगर क रच्छा बरे कउनो मनई क हेरा।
जदि उ रखवारा घुड़सवारन क, गदहन क या ऊँटन क कतारन क लखइँ तउ ओका होसियारी क साथ सुनइ चाही।”
तउ फुन उ पहरूआ जोर स बोला पहरूआ कहेस, “मोर सुआमी, मइँ हर दिन चौकीदार क बुर्ज पइ चौकादारी करत आएउँ ह। हर राति मइँ खड़ा भवा पहरा देत रहत हउँ।
मुला लखा! उ पचे आवत अहइँ। मोका घुड़सवारन क कतारन देखॉइ देत अहइँ।” फुन सँदेसवाहक कहेस, “बाबुल हार गवा, बाबुल धरती पइ ध्वस्त कीन्ह गवा। ओकरे मिथ्या देवन क सबहिं मूरतियन धरती पइ लुढ़काइ दीन्ह गइन अउर उ सबइ चकनाचूर हो गइन ह।”
यसायाह कहेस, “हे खरिहाने मँ अनाज क तरह रौंदे भए मोर लोगो, मइँ सर्वसवतीमान यहोवा, इस्राएल क परमेस्सर स जउन कछू सुना ह, सबइ तू पचन्क बताइ दीन्ह ह।”
दूमा बरे दुःखद सँदेसा। सेईर स मोका कउनो गोहराएस। उ मोहसे कहेस, “हे पहरू, रात अबहिं केतॅनी बाकी बची बाटइ? अबहिं अउर केतनी देर इ रात रही।”
पहरूआ कहेस, “भोर होइ क अहइ मुला राति फुन स आई। अगर तोहका कउनो बात पूछब अहइ तउ लउट आवा अउर मोहसे पूछ ल्या।”
अरब बरे दुःखद सँदेसा हे ददानी क काफिले, तू रात क रेगिस्तान मँ कछू बृच्छन क लगे गुजार ल्या।
कछू पियासे यात्रियन क पिअइ क पानी द्या। तेमा क लोगो, ओन लोगन क खइया क द्या जउन जात्रा करत अहइँ।
उ सबइ लोग अइसी तरवारन स परात अहइँ जउन ओनका मारइ क तत्पर रहेन। उ सबइ लोग ओन धनुसन स बचिके परात रहेन जउन ओन पइ छूटइ बरे तने भए रहेन। उ सबइ भीसण लड़ाइ स परात रहेन।
मोर सुआमी यहोवा मोका बताए रहा कि अइसी बातन घटिहीं। यहोवा कहे रहा, “एक बरिस मँ (एक अइसा ढंग जेहसे मजदूर किराये क समय क गनत ह।) केदार क वैभव बर्बाद होइ जाइ।
उ समय केदार क थोड़े स धनुसधारी, प्रतापी फउजी ही जिअत बच पइहीं।” इस्राएल क परमेस्सर यहोवा मोका इ सबइ बातन बताए रहा।