Please Enter Bible Reference like John 3:16, Gen 1:1-5, etc
hosea - 1 2 3 4 5 6 7 8 9 10 11 12 13 14
Bible Versions
इ यहोवा क उ सन्देस अहइ, जउन बेरी क पूत होसे क जरिये मिला रहा। इ सन्देस उ समइ आवा रहा जब यहूदा मँ उज्जियाह, योताम, आहाज अउ हिजकिय्याह क राज्ज रहा। इ ओन दिनन क बात अहइ जब इस्राएल क राजा योआस क पूत यारोबाम क समइ रहा।
होसे बरे इ यहोवा क पहिला सन्देस रहा। यहोवा कहेस, “जा, अउर एक रण्डी स बियाह कइ ल्या जउन आपन रण्डीबाजी स संतान रखेस ह। काहेकि इ देस क लोग रण्डी क तरह बेउहार करत अहइँ। उ पचे यहोवा बरे अबिस्सासी रहेन ह।”
तउ होसे दिबलैम क बिटिया गोमेर स बियाह कइ लिहस। गोमेर गर्भवती भइ अउर उ होसे बरे एक ठु पूत क जनम दिहस।
यहोवा होसे स कहेस, “एकर नाउँ यिज्रेल राखा। काहे काहेकि मइँ हाली ही यिज्रेल घाटी मँ कीन्ह गइन हत्या बरे येहू क परिवार क सजा देब फिन एकरे पाछे इस्राएल क बंस क राज्ज क खतम कइ देबउँ।
उहइ समइ यिज्रेल घाटी मँ, मइँ इस्राएल क धनुस क तोड़ देब।”
एकरे पाछे गोमोर फुन गर्भवती भइ अउर एक ठु कन्या क जन्म दिहस। यहोवा होसे स कहेस, “इ कन्या क नाउँ लोरुहामा राखा। काहेकि मइँ अब इस्राएल क लोगन पइ अउर जियादा दाया नाहीं देखाउब। मइँ ओनका छिमा नाहीं करब।
मुला मइँ तउ यहोवा क राज्ज पइ दाया देखाउब। मइँ यहूदा क लोगन क रच्छा करब। मुला ओकरी रच्छा बरे मइँ न तउ धनुस अउर तरवार क प्रयोग करब अउर न ही जुद्ध क घोड़न अउर फउजियन क। मइँ, यहोवा, खुद आपन सक्ती स ओनका बचाउब।”
गोमेर अबहीं लोरुहामा क दूध पिआउब तजे ही रही कि उ फुन गर्भवती होइ गइ। तउ उ एक ठु पूत क जनम दिहस।
एकरे पाछे यहोवा कहेस, “एकर नाउँ लोअम्मी धरा। काहेकि तू पचे मोर प्रजा नाहीं अहा अउर मइँ तोहार परमेस्सर नाहीं अहउँ।”
“तउ पइ भी, भविस्स मँ, इस्राएल मँ अनगिनत लोग होइहीं जइसा सागरे क रेत क कन जउन न तउ नापी जाइ सकत ह अउर न ही जेकर गनती कीन्ह जाइ सकत ह। अउर उहइ जगह पइ जहाँ ओनसे इ कहा ग रहा, ‘तू पचे मोर लोग नाहीं अहा।’ उ पचन्क कहा जाईहीं, ‘तू पचे जिअत परमेस्सर क संतान अहा।’
“तउ फुन यहूदा अउ इस्राएल क लोग एक संग ऍकट्ठा होइ जइहीं। उ पचे आपन खातिर एक सासक क चुनाव करिहीं अउर ओकरे लगे आपन पहँटा होइहीं। यिज़्रेल क दिन असल मँ एक महान दिन होइ।”